عینالی جان سلام(تصحیح شده)

عینالی جان سلام

کونول قوشوم قاناد چالیر اوشماقا

ذوقوم ایستور کیمی جوشماقا

قلم آلیب گوزه ل قوشما قوشماقا.

    ................. قلم سوزور سوزوم جوشور چشمه تک

..................1....یاسمنی زنبقی وار مین اتک

طَبعیم بوگون جوشقون دریا اولوبدی

ذهنیم بوگون رویالارا دالیبدی

    دورنالاردان اوچار قاناد آلیبدی

....................خیالیمین موجی گئدیر تبریزه

...............2....رویام دورنام سفر ائدیر تبریزه

هر طرفده ن سیر ائده سن تبریزه

.شوکتیله داغلار چوکوب دیز دیزه

عزتیله خوش گلدون ایلور سیزه

....................خوش گلمیسه ن سویله ییری قوناقا

............3.....قوناقلارون چکیر استی اوجاقا

او داغلاردا بابک آیدین گورونور

ستارخانین قلبی اوردا دویونور

ائلیم باخیر او داغلارا سویونور

...................او داغلارین شوکتی وار آدی وار

...4..............امک بیله ن وفالی اولادی وار

او داغلاردا کوراوغلو یورد سالمیشدی

دشمن لرین باشین داشا چالمیشدی

خان پاشانین گوز اوتونی آلمیشدی

........................عینالی دا او داغلارین بیری دی.

.............5.........دنیا وارکن قوچاقلارون یئری دی

ایگیت لرون یاتاقی دور عینالی

آزادلیقین یاناقی دور عینالی

شجاعتین توپراقی دور عینالی

.......................الهام وئره ر شاعرلرین سوزونه

....6.................هدیه آلار او سوزلرده ن اوزونه

من دورموشام او داغلاردان دانیشام

آتالارین عشق اودیله آلیشام

اونلار کیمی منده دوروب چالیشام

.............    ....ظالمیله دویوش تمام اولمیوب

.....7...............او داغلارین گول چیچه گی سولمیوب

منیم یوردوم بیر بهشت برین دی

آنا دیلیم هامی دیلده ن شیرین دی

دشمنه اوت دوستلارینا سرین دی

......................بیزیم یئرده اوز دیلیمیز اوزوموز

...8.................آنا دیلده حکایه میز سوزومور

آنلامیشام آنادیلین قدرینی

گللر ایچره سئچدیم اونون عطرینی

آیین مگر دانماق اولار بدرینی

........................گون یاییلسا هاوا اولماز قرانلیق

.....9.................گولوستانا دئماق اولماز سمانلیق

وطنداشلار یوردوزون قدرین بیلین

آیری سوزی کتابلاریزدان سیلین

شهریاردا گلدی یازدی اوز دیلین

........................آنا دیلی تئز سسینه سس وئردی

..........10........جوابینا گل وئردی اطلس وئردی

او یازالی حیدربابا حصه سین

دیله سالدی خشکنابین قصه سین

شعره چکدی شادلیقلارین  غصه سین

........................تا کی یازدی آنا دیله سوزونی

...11...............گونش کیمی آدلاندیردی اوزونی

آنا دیلی تئز گوستردی همتین

دیله گلدی شهریارین زحمتین

آیدین ائتدی او شاعرین خدمتین

..........................دئدی یاشا اوز سوزون تک شهریار

....12..................سعادت دن دولدور اتک شهریار

او یازدیقی سوزلر دوشدی دیللره

دیللر سوزون یئتیردیلر ائللره

بلبل اولدی نغمه لندی گوللره

........................حیدربابا سسین یایدی هریانا

...13...............شوکت وئردی یوردوم آذربایجانا

آنا یوردوم کونلوم سنسیز دویویونور

ائشیدرکن تبریز کونول سویونور

ساچلار کیمی داغیلمادان هوردنور

......................سنده ن آیری دوشدوم دیلده ن دوشمه رم

...14...............سنون عشقونده من دیلده ن دوشمه رم

آرزوم بودور بیرده گئده م تبریزه

ائللریله من اگله شم دیزدیزه

بیر قاتیشام غملی اولان غمسیزه

......................دیه م منیم دردیم غمیم دیلیم دی

.....15............یانیخ کونلوم غمده ن دیلیم دیلیم دی

آرزوم بودور بیرده قالخام داغلارا

داغ باشیندان بیرده باخام باغلارا

بیرسئیرائده م قره لره آغلارا

......................اوشاقلارلا بیرده قورام اویونی

....16..............گوره م عزت یاییر دوزه قویونی

عینالی یه چیخام گوره م نه واردی

داغلار ینه بیربیرینه هاواردی

آمیرسید آغ اششگه سواردی

.......................نه وار نه یوخ کیم اولوب کیم قالیبدی

....17...............فلک اوردا کیمی گوزده سالیبدی

عینالی نین یایلیق یئلی سریندی

دره لری بهشتی له ن قریندی

حوض ترلان بیر بهشت بریندی

......................کهلیک اوتی ایگی توتار دره نی

....18.............هوشلاندیرار کهلیک اوتی دره نی

یازدا اوردا هر دره ده بولاخ وار

بوللی گولده ن یول اوستونده چراخ وار

ان موسیقی ان ائشیده ن قولاخ وار

..................اونون سوزی اوزی کیمی شیرین دی

...19............واللاه بوسوز نقیل دگول یقین دی

عینالی دان خاطره لر واریمدی

اونلار منیم سرمایامدی باریمدی

خلوتگاهدا مونسیم دی یاریمدی

.....................سوزآچیلسا هر نه دئسه م آز اولار

..............20 سوزلریمده ن ائلیم سرافراز اولار

عینالی جان جوانلیق الده ن گئتدی

آق توک قره توکون یئرینده بیتدی

هئچ بیلمه دیم کی عمروم هاردا ایتدی

ایتگین دوشدوم اوز یوردومدا قالمادیم

...21.......عمروم کئچدی بیر ثمره آلمادیم.

عینالی جان ایده رضاده ن دیوم

بوگون اونون غیبت لباسین گیوم

سوز قاچیری آغزیما من نه ایلیوم

...................اوره ک سوزون گتیرمیشه م میدانا

....22..........گئچه جاقی گتیر میشه م جولانا

ایده رضا قبرستاندا گزه ردی

ککیککه نی آریلاری ازه ردی

آما اونی آری سانجیب سوزه ردی

...................او دیه ردی منی چرا می سانجید

....23...........بیردانا یوخ اون بئش دانا می سانجید

یوسف سینکا سوره نگونلر نه اولدی

تکر سورماخ ناققیش زمانی سولدی

اورهک لره ایندی فقط غم دولدی

.....................نه ایلیوره م غم غصه نین آخشامین

.....24...........اوتوزموشوق اوشاقلیقین ایامین

اوشاقلیقدا آشیخلاری قوراردوخ

یا اوچ ایاق یا جیزیق اوینایاردوخ

سقه میزی آشیخلارا ویراردوخ

.....................من همیشه آردی یا پئنج اولاردیم

.....25............رضا قیغان اولوب اونی اوتاردیم

گلین گئداخ توپ عربی اوینایاخ

یورولساقدا من دئیه رم نه ایلیاخ

اوندا گئداخ ساققیز آلاخ چئینی یاخ

.......................بوگون نه دور آتیل ماتیل چرشنبه

....26...............آینا تکین بختیم آچیل چرشنبه

فلک قوغدی منده دوشدوم غربته

اصفهاندا مستخدمم دولته

چاره نه دور گرک دوزه م ذیللته

.......................هئچ کیمسه یه آللاه غربت وئرمه سین

...27...............غربت ئیرده هئچ مصیبت وئرمه سین

عینالی جان سن تبریزین دامیسان

سهندی سن البرزی سان یامی سان

ساوالان تک جهان نما جامی سان

........................آدام باخیر عزتیله ن تبریزه

....28...............فرح له نیر شوکتیله ن تبریزه

عینالی جان بایرام یاخینلاشاندا

قیشین گونی آغ باشیندان آشاندا

بولاقلار قایناییب یئرده ن داشادا

........................چوخ سویمه لی منظره لر سنده وار

....29...............بیر دئه گوروم منه نه لر سنده وار

سیزده به در قالین پالتار گیه ر دوخ

داغدا بیربیر اوزوموزده ن دیه ر دوخ

قار گتیروب دوشابینان ییه ر دوخ

.......................سیدخانم منی دعا ائده ردی

....30..............قار دوشابی ییوب دوروب گئده ردی

حوض ترلان سویی هدر آخماسین

سوسوزلاری یاندیرماسین یاخماسین

یولدان کئچه ن اونا حسرت باخماسین

............................او آغلاسا یولدان کئچه ن گوله جاخ..

.....31...................داغداکیلار اونون قدرین بیله جاخ

کهلیک بولاغ طبیعتین یخجالی

سویون ایچه ن اولور حالی به حالی

حقیقتا حاللاندیرار احوالی

.......................ایچه ن دیه ر بو سو شیرین بیر مئی دی

....32..............زمزم ده ن ده کوثر ده نده چوخ یئی دی

آجی چایی یاواش یاواش آخاردی

اوزه ن لره قوجاق اولوب باخاردی

شلاله سی داشدان آشیب شاخاردی

.......................او شور سویون انی بویی چوخیدی

...33..............هئچ کیمسه ده نگرانلیخ یوخیدی

قاطار قیه یولون قیزلارچیخاردی

بیری بیرین ایته لیوب ییخاردی

یئل اونلاری قوجاقیندا سیخاردی

..........................بیز قیزلارا  قیافه لر توتاردیخ

....34.................آتدان آتدان حسرتیله ن باخاردوخ

بیر دسته ده تئز تئز داغا گله ردی

سردسته سی درس وئرماقا گله ردی

بهروزونان اصغر آقا گله ردی

........................دیه ر دیلر بیر بیرینه سوزلرین

...35................خلقه مسئول بولردیلر اوزلرین

او جوقه نین سردسته سی بیله ردی

بولدوقونی اونا بونا دیه ر دی

دانیشیندا آغلیاردی گولردی

....................دوشونماقدا بوردا بویوک بیر دردی

...36............دوشونه نه اولوملی زندان گتدی

ائشیدمیشدیم مملکتده ساواک وار

دانیشانی ایلیوللر گرفتار

آنلیانی دوشونه نی توتوللار

........................هئچ کس گرک دانیشمایا ایراندا

....37.................سیاسته قاریشمایا ایراندا

بهروز دوردی سیاستده ن دانیشدی

اصغر گلدی ساواکی له ن آتیشدی

علی اوختای خلق اودیله ن آلیشدی

.......................بونلار اوگون خلقه چراغ اولدولار

....38...............چتین گونده خلقه دایاخ اولدولار

دیه ردیلر ساواکی لار قوتدولار

اصغریله ن بهروزو دا توتدولار

اوختایی دا تیکه کیمین اوتدولار

.....................اونلار گئتدی اما قالدی آدلاری

....39.............خلق ایچینده غنچه له نر یادلاری

حسین دایی داغ باشیندا آغلاردی

آغلیاندا اوره گیمی داغلاردی

بهروزونان اصغره سوز باغلاردی

.....................دئدی اونلار صمد یولون گئتدیلر

....40............اوزلرینی خلقه فدا ائتدیلر

من سوروشدوم صمد کیمدی یولو نه

اونون سوزون اونون یولون دئه منه

صمد نه یه بوجور دوشدی محنه

...................نه کاره ایدی دئنه منه ایشینده ن

....41...........مرامین ده ن مسلکین ده ن ایشینده ن

حسین دایی باشلایارکن سوزلرین

گوزیاشیله ن او دولدوردی گوزلرین

اونلار خلقه فدا ائتدی اوزلرین

...................صمد جرمی بودور حق سوز دانیشدی

...42............خلق اودیله ن اودا یاندی آلیشدی

گئت صمدین کتابلاریندان اوخی

دوشون دوزی آنلا آزی قان چوخی

عصیان ائله چه ک میدانا وار یوخی

.....................اوندا بیله ر سن کی صمد نه ایله دی

....43.............حق یولوندا قاخدی جوشدی قاینادی

یادا سالدیم من اونلارین جوقه سی

من دویمادیم بیر اونلارین حق سسین

هئچ دئمه دیم آی دومانلار سیز اسین

........................دومانوزدا منده گلیم اویناغا

...44.................منده گلیم حق یولوندا قیناغا

شاهین ظلمی دامدان باجایا دولدی

هرگونوموز کئچه ن گونده ن پیس اولدی

انسانلیقین گولی وطنده سولدی

.......................ملت حکومت ده ن امانه گلدی

....45..............شاه الینده ن آه و فغانه گلدی

یاواش یاواش بیزیم ملت آییلدی

انقلابین سوزی سوزده یاییلدی

شاهدا خلقه بیوک دشمن ساییلدی

...................ملت بیربیر قاتیشدیلار قیاما

.46..........شعار قالخدی حیاط ایچین داما

.من او زمان پیس یوخودان اویاندیم

دوشونمه می من بو قیامدان آندیم

یاخشی پیسی بیلدیم دوشوندوم قاندیم

....................منده دوردوم انقلابا قاریشدیم

.....47..........ظالمیله اوز به اوزه آتیشدیم

ایندی بیلدیم صمد گئده ن یوللاری

هر قدم ده من گوروره م اونلاری

من ده قیردیم تیکانلاری کوللاری

....................قارا بالیق دریاسینا یول تاپدی

...48.......اوچماقینا قاناد تاپدی قول تاپدی..

گلمیشیدی ملت ظلوم ده ن جانا

ویریش گئتدی اصفهانا تهرانا

ملت گلدی شاهین الینده ن جانا

...................تبریز دوردی اصفهانا یار اولدی

.....49...........گنیش ایران ظالملره دار اولدی

اصغر اولدی بهروز دوشدی زندانا

چوخ ایگیت لر دوشدی یاتدی یان یانا

خیاوانلار بویاندیلار آلقانا

....................ظلمون ایشی بو دنیا دا بئله دی

....50...........ظلم الینده ن خلق انقلاب ائله دی

انقلابا بیزیم ملت سویوندی

حقین سوزی حقین اوزی گوروندی

حقه خلقین اوره ک لری دویوندی

.....................آزادلیقدان بیر آز بیزه یئتیشدی

...51..............ایشیقی دا ائویمیزه یئتیشدی

ایندی آلدیم عینالی نین درسلرون

ایندی آندیم بهروز گیلین سسلرون

ایندی تاپدیم یولون او دوز کسلرون

..................ایندی دا بیز هر صمده اولدوزوخ

.....52........بوندان سونرا بیز هامی میز بهروزوخ

ایندی بیلدیم آزادلیقین لذتین

ایندی تاپدیم اوز دیلیمین عزتین

ایندی آندیم اوز ائلیمین قدرتین

....................دنیا وارکن بو آزادلیق وار اولسون

....53............ائل دشمنی دیل دشمنی خوار اولسون

ایندی بیلدیم آنا دیلیم نه ایمیش

بیلمه دیگیم کره ک بیلیم نه ایمیش

بیلمه ماقا من دلیلیم نه ایمیش

..................ایندی گره ک بیله م قانام اورگه شه م

...54.........اوز دیلیمه اوز ائلیمه الله شه م

من مستیدیم آزادلیق رویاسیندا

دایاقیدیم قیامین دالداسیندا

مهره ایدیم بو اویونون تاسیندا

...................آرامیزدا چوخ تئز آرا سالدیلار

.55..............انقلابی الیمیزده ن آلدیلار

دئدیم بس کی آزادلیقا یئتیشدوخ

غملر گئتدی بیز شادلیقا یئتیشدوخ

ویرانه ده ن آبادلیقا یئتیشدوخ

..................آما گردوخ دین گلدی ایمان آلدی

....56..........کافر الی دینده ن مسلمان آلدی

دیکتاتورلوک گونده ن گونه چوخالدی

آج زلی میز قانلار ایچدی توخالدی

نفتی ساتدی پوللارینا اوخ آلدی

....................بیر باخمادی یارامیزین کوزونه

....57...........تاخدی اوخو جماعتین گوزونه

آزادلیقا دوباره حسرت قالدوخ

اوزوموزی بیوک بلایه سالدوخ

آما بوردا ملالاردان درس آلدوخ

.....................بیلدوخ دینین حکومتی قانلی دی

.58................بو کافرین اللری قرآنلی دی

اسلام اولدو اسکولاستیک پرچمی

محبتلر سیللی تپیک پرچمی

هر یئره آسلاتدیلا سیک پرچمی

...................آنلامادیخ ایرانلیوخ یا هندی

...59...........ملتی ائششک ایلیه نده میندی

ایندی بیلدیم دین ده سیاستی ایمیش

دین آدینا فکری حکومت ایمیش

قورخوتماقا سوزی قیامت ایمیش

....................جهنمین قورخوسونی پایلاشدی

....60............بیلماقیلن گولماقیلن ساواشدی

نه صمدین آدی گلدی دیللره

نه بهروزی ویردیلا نیسگیللره

مملکتی وئردیلر انگیل لره

................ایرانلی یه بو مملکت قالمادی

...61........ایرانلی نین دردین کیمسه آلمادی

عرب دینی توتدو منیم کندیمی

بو آنلاماز زهر ائله دی قندیمی

تومان اوستن قیردی منیم بندیمی

...................قویمادیلار گولسون بیزیم اوزوموز

....62..........آغلاماقدان یاشلی قالدی گوزوموز

دئمه دیلر بوردا نئچه ملت وار

هر ملتهاوز دیلینده عزت وار

هر بیرینه تاریخ بویی شوکت وار

...................هرکس گرک آنادیلین دانیشسین

....63..........هرقوش گرک اوز قانادیله اوشسون

بیربیرینده آییردیلار ملتی

پایلاشدیلار ملت ایچره ذلتی

یاندیردیلار قدیمده کی شوکتی

...................کوردی سالدی آخر ترکون جانینا

.....64..........بلوچ لاری بویاندیردی قانینا

آرزوم بودور اولکه مده زور اولماسین

اصلانلیقا بو تولکو لر دولماسین

آزادلیقین گولی بوردا سولماسین

...................هامی بوردا شادلیقینان یاشاسین

....65...........بوشادلیقدا هامی ایران یاشاسین

ایرانیمین گوزه للیگی بوردا دور

هر نه دیل واربو سوزده منظور دادور

دیللرینین هامیسم منشوردادور

.....................ایران گره ک بیر پارچالیقدا قالسین

.....66............الده ن وئره ن شوکتینی پس آلسین

منیم آتام گوزه ل ستارخانی دی

مشروطه یه بیوک نگهبانیدی

او گونلرده ناجی ایرانیدی

.................بیز ظلومی مین کره ده ییخ میشوخ

....67.........نه اولوبدی ایندی یاددان چیخ میشوخ

ملت  گوردی چاره یولی باغلیدور

اوره ک لری اعدام لاردان داغلی دور

ظالملرین چوره ک لری یاغلی دور

.................دین الینده ن دالین چئویردی دینه

....68.......ملت گیردی اوز ایچینین ایچینه

دین کی گلدی هر شئی بیرده ن قاریشدی

بت پرست لیق اسلامینان قاریشدی

(دیه رسیز) لر بیت المالا داریشدی

.....................آپاردیلار مملکتین وار یوخون

....69.........داغیتدیلار هم آزینی هم چوخون

گره ک ینه عینالی یه یول سالام

عینالی دان بیرده ینی درس آلام

بیرده گرک نفیر جنگی چالام

................بیر ینی انقلابه سامان وئره م

.....70......بو اولومجیل ملتیمه جان وئره م

عینالی دان دئدیم گینه آییلدیم

اوشاقلارون جوقه سینده ساییلدیم

گونش کیمی کولگه لره یاییلدیم

....................بیرده گئتدیم اوشاقلیقین شهرینه

...71.............شیرین قاتدیم سیاستین زهرینه

بو سوزولن فیکریم گئتدی تبریزه

سرخابینان من اگلشدیم دیزدیزه

گلین دیوم گوزه ل نقیل لر سیزه

..................قدیم سوزلر ایندی یاددان چیخوبدی

..72...........بو دین بیزیم ائویمیزی ییخوبدی

گلین گئداخ توپ عربی اوینیاخ

یورولساخدا من دیه ره م نه ایلیاخ

اوندا گئداخ ساققیز آلاخ چئینیاخ

..................بوگون نه دور آتیل ماتیل چرشنبه

.....73.........آینا تکین بختیم آچیل چرشنبه

اوشاقلیقدا غملی اولان آزیدی

جماعتین کئفی بوندان سازیدی

اوچ آشیقی آتان قماربازیدی

......................بیز او زمان ادب سیزلیک بیلمه زدیک

....74.............سورتوک آشیق کیمی هئچه گولمه زدیک

آخشام چاقی پیل دسته اوینایاردیخ

اولاتمایا بیوک چیچیک گله ردیخ

پول اولسایدی بیرگول قوپا آلاردیخ

..................فرق ائله مه ز اوزون قازان اوزون یئه

75....... .....قوپا گوردون تازاسین آل اوگون یئه

قیزلار اوندا ییغیشاردی بئش داشا

اوغلانلاردا اوچ ایاقا ناققیشا

لوپوک گازدا داشی ویراردوخ داشا

..................یومورتام وار بیری گلسین چاقیشاق

...76.........قاچان واردی گلسین من له باغلاشاق

قاییش قاچیتدی اوینایانلار هانی

گئچه چاغی نغیل دیه ن لر هانی

اوغوج اوغوج کشمش ییه نلر هانی

.................هاردادیلار شاقیلیوب گولن لر

....77.........نه اولدولار راه و رسمی بیلن لر

گاه ییغیشوب شیرین نغیل دیه ردوخ

گاه اوچ ایاق یا جزیخ اوینایاردوخ

طلادی ده جیغانلیق ایلیه ردوخ

..................آخر بیری دویونلری آچاردی

....78.........آشیقلاری اوغوشلاییب قاچاردی

بو اویون لار محبت آرتیراردی

فاصله نین ایپین کسیب قیراردی

بیر اولماقین یولون بیزه آچاردی

.................قورتاراردی بو اویناماق شادلیقدا

...79.........یئر آچاردی باغلیقدا آزادلیقدا

کوکب خانم اریکلری ازه ردی

تشت ایچینده اونی داما دوزه ردی

ال ویرسایدوخ آغزین گوزون بوزه ردی

.....................صبر ائله روخ اریک اوچ گونده پیشسین

.80..............لاواشالار بارا گلسین یئتیشسین

کئفلی قافار بیوک جوانمردی دی

الی آچیق سفره لی خان مردی دی

درده دیه ن الده ن توتان مردی دی

....................آما هرده عراق ایچیب قاتاردی

.....81..........هر یئر وارسا باشین قویوب یاتاردی

بیزیم سرخاب بولن لره اردودی

خاقانی نین ساحرلرین یوردو دی

صحاف کیمی نوحه یازان مردی دی

......................هرنه سی وار کیشی لیقدان نشاندی

....82.............سرخاب منه بیر جلوه لی ایراندی

محرم ده شاخسئی گئده ن چوخی دی

یاوا دیه ن پیس ایش گوره ن یوخیدی

نوحه سوزی اصغری دی اوخی دی

...................نه اولدی بس غم گتیره ن نوحه لر

.....83.........اورکلری قان ایله ین نوحه لر

صافی دوروب اکبر شعری اوخوردی

سعدی زمان اصغر شعری اوخوردی

تائب بیرده ن حیدر شعری اوخوردی

........................مجلس بیرده ن انقلابا دولاردی

.....84..............آغلامایا ن بوتاخ کیمی سولاردی

اوندا فلک یاخشی جوقه قورموشدی

پیس اولانین قولاقینی بورموشدی

هر شئی واللاه اوز یئرینده دورموشدی

.....................گون گونوزون آی گئجه نین پاییدی

..85............هامی اوگون بیر بیرینین تاییدی

ماللا گلدی نوحه لرده قاریشدی

بت پرست لیق اسلامینان قاریشدی

(دیه رسیز) لر بیت المالا قاریشدی

.....................آپاردیلار مملکتین وار یوخون

..86..............داغیتدیلار هم آزینی هم چوخون

مالا دئدی ائوده ن خبر گتیرون

گیزلین خبرلری بیزه یئتیرون

بویوک چیچیک حرمتینی ایتیرون

...................بیر آنا دا اوغلون اعدامه وئردی

...87............بئله بیلدی بورجون اسلامه وئردی

ایندی داها ائوده امان قالمیوب

صداقتده ن بیرجه نشان قالمیوب

دین کی گئدوب ایماندا جان قالمیوب

...................دیوار سیچان سیچان قولاق اولوبدی

....88...........امنیتین بورداگولی سولوبدی

آجلیق دوشوب خلقیمیزین جانینا

زلی دوشوب یارامیزین قانینا

رحم ایله میر رعیته خانینا

......................قارداش دوروب اولدوروری قارداشین

....89............آتا کسیر اوز بالاسیندان باشین

مسجدیمیز نافرمانلیق اورگه دیر

مدرسه میز بی ایمانلیق اورگه دیر

دانشگاه لار بی ایمانلیق اورگه دیر

.......................قالماییبدور بیر احترام آرادا

...90...............آغ بوزاریب رنگی قاچیب قارا دا

ایندی بیزیم آللاهیمیز مالادی

عبادته درگاهیمیز مالادی

عبالی شاهنشاهیمیز مالادی

......................ایرانلی لار هامی اولوب بت پرست

.....91...........حوزه لر ده بوللی دولوب بت پرست

بیز گوروروخ بو ظلومی دینیروخ

خیناوانی  پیس اولومی دینمیروخ

ناحق الینده بولومی دینمیروخ

.......................عاشورا دا آنجاق قمه ویریروخ

....92...............اوزوموزی مالالارا جیریروخ

هاردا قالیب اوشاقلیقین لذتی

نه جور سیندی گل گئت لرون فرصتی

نیه باتدی صداقتین صحبتی

...................نیه گره ک عشقین چراغی سونه

....93..........نه اولوبدی بیز دوشموشوخ پیس گونه

ملت دورون قفسلری سیندیراخ

حقیمیزی اوزوموزه آندیراخ

حقیمیزده اوتور بیرآز هایقیراخ

...................اوندا مالا تومانی نی آتاجاق

..94...........عمامه سین قویوب بوردان قاچاجاق

نه عیبی وار سیز دینیزی ساخلایین

آما بیر آز حقیقتی حاخلایین

حق ده ن اوتور بیر کره اویناخلایین

...................هانسی بیر دین ظلمی روا بیلیری

.....95...........مالاسینی عین خدا بیلیری

من دمیره م سیزین دینیز اولماسین

آما دینیز خرافه دن دولماسین

بعضی لره دینین گولی سولماسین

...................سیزین دینیز سیزین منیم کی منیم

....96...........قبول ائدیم او دینی کی بگه نیم

سیز دینیزی سیاسته ساتمایین

هئچ وقت دوزی شکریزه قاتمایین

دوغرو دینی سیز باشیزدان آتمایین

.......................سیز کی بو ظلمده ن گلیبسیز جانا

...97..............حق ده ن اوتور دورون دوشون میدانا

بیربئله دین آداملارا نه لازم

بو کتابلار بوش بئکارا نه لازم

بو یازیلار دام دووارا نه لازم

....................آللاهیمیز بیردی اونی پیر اولسون

...98............نه اولار کی دینیمیزده بیر اولسون

ایندی نه شاه ایسته ییریک نه مالا

آلما وئره مالا اولار یئرالما

ملا سنه قیزیل دا وئرسه آلما

....................مالادا شاه کیمی بوتون ضرردی

...99.............هم قره سی هم آغیدا ضرردی

بیز سیکولار دموکراسی ایستیروخ

آزادلیقدا حق الناسی ایستیروخ

قره نفت ده ن آغ الماسی اسیتیروخ

......................هرنه وارسا بیت المالین اولاجاق

....100..............نه لبنانلی نه ده روسلی آلاجاق

اسکولاستیک دوره سی ده قورتارار

رنسانسین بوغداسی دا دارتیلار

بو قوردلارین دیشلری ده قارتیلار

..................ایران اولار اوندا بهشت برین

....101.........اوندا دینه (وافی ) سنه آفرین

.................سون.......