............................سوسوز مارال......................
گوزلریم منتظر اوره گیم قاندی
الیمده قلم وار دیلیمده سوزوم
ایستوره م سوزومی وئره م قلمه
آما قالماییبدور گوزومده دوزوم
.....
آغلاماق قویماییر سوزومی یازام
اوره گین قانیدا گوزومده ن آخیر
کدرلر ذره جه امان وئرنده
گوزلریم یوللارا انتظار باخیر
....
ایستوره م قلمی آتام بیریانا
نیسانلار بولودی اولام آغلیام
یا کونول قانینی گوزومده ن توکم
یا یاری گورماقا امید باغلیام
.......
قلمین گوزیاشی گوزومده ن آخیر
دیه سن بیلیری اوز وظیفه سین
اودلی سوزلریله گلیب میدانا
قانیله دولدورور غم صحیفه سین
........
دیه سن ایسته ییربو غملی مکتوب
یازارکن یازیدا مرادین آلا
وصلته یتیره آیری دوشه نی
گوروشون ماراخلی نغمه سین چالا
......
مضرابین دوداقی سیمه دیه ر کن
آیری دوشموش ائلی ییغار بیر یئره
محبت ماهنی سین وفا نغمه سین
بیریئره ییغارکن دولدورار شئره
........
شعرینده سسله یه ر اوتای قارداشین
دور منیم سسیمه سسیوی قالخیز
بسدور بو آیریلیق بسدور بو تک لیق
سن اوردا غریب سن من بوردا یالقیز
.......
بو گئجه بیلمیره م قیامت قوپوپ
یا خیال قوشودی منی آپاریر
چیخوبدور قارداشیم غریب لیگینده ن
یالقیزلیک دوره سی منه قورتاریر
......
یوخ اومود آغاجیم قورومیوبدور
بیلیره م چیتداییب چیچک لنه جک
سعادت هماسی ینه اوچاراق
بیزیم اولکه میزده گلیب یئنه جک
....
یوخو بیر قوش اولوب اوچوب گوزیمده ن
خیاللار شهرینده یاتاق سالیبدی
اوچارکن یئتیشوب یار دیارینا
یارباغین گورمه گه رخصت آلیبدی
........
خیاللار شهری یارین دیاری
نه گوزه ل سویمه لی یاتاق یئریدی
محبت ماواسی یارین کناری
عاشقه قالمالی قوناق یئریدی
......
یارباغین آلیبدی نغمه لر سسی
نغمه لر هامیسی محبت یاییر
خیالین بولبولی یار حضورینا
هجرانین بیر به بیر دردلرین ساییر
........
آیریلیق نه چتین بیر امتحاندور
هئچ کیمسه یاریندان آیری دوشمه سین
ایلاهی لطف ائله اوزون اماندور
بو زخمه تاریندان آیری دوشمه سین
.......
آیریلیق بیر اوددی اوره گه دوشسه
اود ویرار اوره گی یاندیرار یاخار
آیریلیق اودوندا اوره ک شمع اولار
جانینین مایه سی گوزونده ن آخار
........
آما یوخ آیریلیق باشا یئتیشوب
نه دیوار قالیبدی نه قاباق آلان
ایندی قارداشلارین گوروش وقتیدور
اولوبدور آیریلیق قصه سی یالان
......
آختاریر آتالار بالالارینی
باجی ده تاپاجاق قوچاق قارداشین
بالانی چکه جک باغرینا آنا
سیله جک قارداشین یاجی گوزیاشین
......
یالقیزلیک سیناجاق غربت اوله جک
غم قاچاق دوشه ر کن شادلیک گله جک
آشنالیق نسیمی اسه ن گویلره
کیم دئیه ر آیریلیق یادلیق گله جک
......
یاریم بوتایدادور یاریم او تایدا
یاری من یاری او قاریشمالی ییق
بیرلیگین لذتین تاپماقدان اوتری
کوسولی اولمادان باریشمالی ییق
.......
ال اله وئره جک اونلار بیزیله
اگر اگری فلک گلیب دوز دئسه
شادلیقین سفره سی آچیلاجاقدور
بیر پایی منیم دور بیرین او یئسه
.......
بوردا چشمه چشمه بولاقلاریم وار
اوردا دا مینلرجه سوسوز مارالیم
بولاقین داش قومون گوتوره جاغام
یول سالام اوتایا بودور خیالیم
.......
مکتوبوم گوزیاشیم قیشقیریق اولوب
سسله ییر اوتایدا سوسوز مارالی
اولارمی من جوشقون دنیز بوتایدا
سن سوسوز قالاسان منده ن آرالیَ
هیچ نظری موجود نیست:
ارسال یک نظر